Bukuritë e qytetit të një mbi një dritareve, vijojnë të magjepsin turistët vendas e të huaj të cilët e frekuentojnë gjatë gjithë vitit.
Shifrat tregojnë se në muajt shtator dhe tetor, kalanë e Beratit e kanë vizituar rreth 20 mijë e 715 turistë vendas e të huaj. Ata janë kryesisht nga Polonia, Gjermania Çekia e Holanda, e krahasuar me vitin e shkuar, shifrat janë rreth 4 herë më të larta.
Berati numëron rreth 486 monumente kulture dhe kjo ka një impakt të jashtëzakonshëm, sidomos në rritjen e fluksit të turizmit kulturor.
Kalaja e Beratit është ndërmonumentet më të mëdha historike të Ballkanit, një fortesë e madhe që sundon mbi lumin Osum. Kalaja është ngritur sipas një plani në formë trekëndëshi e po të shihet nga poshtë, duket si pjesë e kodrës.
Kulla e hyrjes së brendshme është e bërë nga blloqe guri, që u përkasin fortifikimeve ilire, të cilat janë ndërtuar në shekujt IV-II para Krishtit. Maja e kodrës është e rrethuar me një mur të jashtëm periferik me 24 kulla. Në brendësi të kësaj kalaje ndodhen rreth 14 kisha, të cilat e kanë bërë mjaft të dëgjuar atë.
