Turqit shpikin makinerinë që shndërron në ushqim për kafshët atë që lënë njerëzit

Nxënësit e shkollave të mesme në Turqinë qendrore kanë shpikur një makineri që e shndërron ushqimin e mbetur në ushqim për kafshët.

Nxënësit në një shkollë të mesme teknike në qytetit Konias zhvilluan një skemë për të reduktuar mbetjet nga ushqimi i mbetur në kafeteritë e shkollave, institucioneve publike, hotelet dhe restorantet, dhe t’i kthejnë ato në ushqim për macet dhe qentë.

Tayyip Sarı, drejtori i shkollës, tha për Anadolu se shkolla e mesme i kushton rëndësi të madhe parimit të mbeturinave zero.

Sarı tha se ata bënë kërkime se si të përdorin të gjitha llojet e mbeturinave të ushqimit dhe se disa departamente punuan së bashku në procesin e konvertimit të ushqimit të mbetur në ushqim për kafshët shtëpiake.

“Ne bëmë disa eksperimente. Ne testuam disa metoda të ndryshme për ruajtjen e ushqimit në mënyrë organike për një kohë të gjatë dhe për të zgjedhur se cilat përzierje do të ishin më të preferuara për kafshët. Së fundmi patëm sukses dhe krijuam një prototip”, tha ai.

Sarı deklaroi se ata kanë shpërndarë rezultatet e punës së tyre në mbarë vendin me ndihmën e Ministrit të Arsimit Kombëtar Mahmut Özer.

“Ne jemi të emocionuar dhe krenarë që jemi pjesë e një projekti që do të gostisë shoqëruesit tanë, kafshët, duke i bërë të lumtur edhe kafshët, edhe neve të gjithëve”, tha ai.

Procesi i rikuperimit të ushqimit përdor katër makina. E para është një grimcues, ku materialet ushqimore priten në copa të vogla, pasuar nga procesi i fermentimit në një makinë të dytë. Madhësia e ushqimit rregullohet në një të tretën dhe në fund nëse nuk konsumohet si ushqim i lagësht, thahet në furrë.

Ismail Samet Erdemir, një nxënës i klasës së 10-të në Departamentin e Automatizimit, tha: “Ne po ndihmojmë miqtë tanë, kafshët. Departamenti i Automatizimit projektoi instalimet elektrike dhe panelet e makinerive. Shokët e mi dhe unë jemi shumë të lumtur që marrim pjesë në këtë projekt”.

Burak Döner, një nxënës i së njëjtës klasë, tha se edhe ai vetë ka një qen, dhe shtoi: “Riciklimi i mbeturinave është shumë i rëndësishëm këto ditë, kur burimet tona janë të kufizuara. Me këtë projekt, ne përdorim mbeturinat tona shtëpiake dhe njëkohësisht ndihmojmë miqtë tanë, kafshët”.