Në ambasadën iraniane në Tiranë që ndodhet në rrugën “Mustafa Matohiti” raportohet se shihet një dritë në formë flake. Ende nuk dihet ende se çfarë po ndodh aty, por raportohet se po digjen dokumente në fuçi që janë futur brenda ambasadës përmes një kamionçine. Gjithashtu mësohet se dy oficerë policie, një i repartit “Shqiponja” dhe tjetri i Forcave të Rendit janë paraqitur në zyrat e ambasadës.
Pas vendimit të Këshillit të Ministrave, ambasada iraniane ka 24 orë afat për tu larguar nga vendi, ultimatum i bërë nga kryeministri Edi Rama këtë mesditë pasi shkëputi marrëdhëniet diplomatike me Iranin. Ai konfirmoi sot me zë e figurë që Irani ka sulmuar të dhënat e shtetit shqiptar. Sipas Ramës, Irani kishte kontraktuar 4 grupe për të kryer sulmin kibernetik ndaj Shqipërisë, ngjarje e ndodhur gjatë muajit korrik, ku shërbimet online dhe faqet qeveritare u mbyllën përkohësisht.
Discussion about this post