Sërish “tym i zi” nga Kosova. E teksa Vatikanit iu deshën vetëm 2 ditë dhe 4 raunde votimi për të zgjedhur Atin e Shenjtë, mes politikanëve në Kosovë nuk ka dakordësi për kryetarin e Kuvendit.
Sot ishte tentativa e 13-të për konstituimin e një nga institucioneve më të rëndësishme, siç është parlamenti, por pati fatin e 12 të tjerëve.
Kryetari i përkohshëm i Kuvendit, deputeti Avni Dehari, tha se nuk u arrit kuorumi i nevojshëm në mënyrë që votimi për kryeparlamentarin të jetë i fshehtë. Vetëm LVV-ja është pro kësaj lëvizjeje, ndërsa partitë e tjera e refuzojnë atë, madje nuk e votojnë fare.
E kësisoj 3 muaj nga zgjedhjet, Kuvendi i Kosovës mbetet ende i pakonstituuar. Kjo bën që vendi të mos ketë as qeverinë e re të dalë nga votimet e 9 Shkurtit. Seancat për konstituimin e institucioneve të reja ka nisur që me datë 15 Prill. Deri më sot nuk është zgjedhur ende një zgjidhje.
Lëvizja Vetëvendosje e Albin Kurtit ka propozuar Albulena Haxhiun si kryeparlamentare. Por kjo kundërshtohet nga partitë opozitare. Ata e konsiderojnë atë si figurë përçarëse. Gjatë kësaj kohe, LVV nuk ka arritur t’i bëjë votat për të miratuar kryeparlamentaren, por gjithsesi nuk heq dorë nga ajo, pasi e konsideron si kandidate “meritore”.
Duke parë situatën, LVV iu drejtua LDK-së me një kërkesë për koalicion. Por kjo u refuzua nga kryetari Lumir Abdixhiku, i cili ka bërë thirrje për një qeveri tranzicioni.
Kjo është kundërshtuar nga Vetëvendosja, por partitë e tjera parlamentare kanë shprehur vullnetin për të biseduar.
Deri më tani nuk dihet se si do të veprohet, ndërkohë që është folur edhe për zgjedhje të reja.
Discussion about this post