Pas djegies së mbeturinave që prej të martës në Bashkinë e Patosit, zyrtarët vendor janë kujtuar që të bisedojnë me përfaqësuesit e inceneratorit të ngritur në Fier.
Duket se dhe Bashkia e Patosit ndjek skenarin e Bashkisë së Fierit që kur fusha e mbetjeve një muaj më parë mori zjarr u kujtuan të bëjnë marrëveshje me koncesionarin. Sekretari i përgjithshëm i bashkisë së Patosit Shkëlqim Beqiraj nuk dha më shumë informacion se nga bisedimet me përfaqësuesit e “Integrated Technology” u diskutua apo jo tarifa e përpunimit të plehrave apo dhe sasia që marrin përsipër.
Tymi që çlirohej nga djegia e plehrave ka mbuluar fshatrat Zharrës, Sheqishte dhe Marinëz, që ndodhen shumë pranë fushës së mbetjeve gjatë gjithë natës, duke shkaktuar të banorët probleme me frymëmarrjen.
Ka qenë ankesa e ambientalistit Qani Rredhi, i cili banon aty, për të nisur dhe mbulimi me dhe i mbetjeve disa vjeçare. Pasditen e së martës zjarri ra fillimisht në një sipërfaqe me ullinj e më pas u përhap në fushën e mbetjeve. Flakët pas disa orësh u vunë në kontroll por gjatë natës dhe ditës së sotme për shkak të erës u përhapën sërish.
