Një 19-vjeçar shqiptar banues në Arzignano të Italisë ka ndërruar jetë pas plagëve të marrë në një aksident me makinë. I riu shqiptar, identiteti i të cilit nuk bëhet i ditur, u aksidentua të dielën teksa udhëtonte me shokët në një makinë tip Lancia.
Aksidenti tragjik ndodhi rreth orës 10:00 teksa pesë të rinjtë ishin nisur drejt Venezia-s. Dyshohet se shoferi ka humbur kontrollin e mjetit duke dalë në këtë mënyrë nga rruga dhe më pas është përplasur me një barrierë betoni. Mediat italiane shkruajnë se përplasja nuk ka qenë shumë e fortë, por gjithsesi i ka shkaktuar dëme të rënda 19-vjeçarit shqiptar.
Ditën e hënë zemra e 19-vjeçarit pushoi së rrahuri, ndërsa autoritetet po vijojnë hetimet për të zbuluar dinamikën e ngjarjes.
Në makinë në momentin e ngjarjes ndodheshin 5 persona, të gjithë shokë me njëri-tjetrin. Dyshohet se shkak i aksidentit mund të jetë bërë përgjumja e shoferit gjatë drejtimit të mjetit, megjithatë detaje të tjera pritet që të dalin në ditët në vijim.
