Gjykata e Apelit ka lënë në fuqi vendimin për hetimin e gjyqtarit Alban Toro. Sipas vendimit ai do të hetohet nga SPAK për falsifikim dokumetash. Në akuzën që është ngritur ndaj tij, thuhet se Toro ka gënjyer Kuvendin për punën e tij si avokat dhe u zgjodh në KLGJ në kundërshtim me ligjin.
Toro në 15 vitet e fundit e ka pezulluar 3 herë aktivitetin e tij si avokat, dhe në një rast të tillë KLGJ ka të drejtë që të kërkojë ndërprerjen e mandatit të tij. Mosplotësimi i kriterit për vijmësinë e punës nuk është i vetmi problem për Toron pasi për të ka dyshime edhe për burimin e pasurisë dhe bashkëshortes gjyqtare në gjykatën e Apelit të Tiranës, Elona Toro.
Ndërkohë që të dy, burrë e grua, si burim të pasurisë së tyre kanë deklaruar vetëm të ardhurat si avokat dhe gjyqtare. Ndryshe nga bashkëshortja e tij, figura e Toros ende nuk ka kaluar në Vetting, ashtu si anëtarët e tjerë në KLGJ, por për të ka mjaftuar vetëm rekomandimi nga Avokati i Popullit dhe Kuvendi.
