U akuzua për korrupsion në organet e drejtësisë, GJKKO jep vendimin për ish-gjytaren Vyshka

GJKKO ka dënuar me dy vite shërbim prove për Zamira Vyshkën, ish-gjyqtare e Elbasanit. Gjithashtu GJKKO vendosi që ti heqë Vyshkës të drejtën për të ushtruar funksione publike për 3 vjet.

Ndërkohë për avokatin Ilir Pashaj u vendos 2 vjet burg, por për shkak të gjykimit të shkurtuar do të vuajë 1 vit e 4 muaj.

Gjithashtu për Taulant Ramollarin GJKKO vendosi 1 vit e 4 muaj burg.

Në janar të 2023, SPAK dërgoi për gjykim në Gjykatën e Posaçme të Shkallës së Parë për Korrupsionin dhe Krimin e Organizuar gjyqtaren e Elbasanit, Zamira Vyshka e akuzuar për korrupsion në organet e drejtësisë.

Kjo pasi dyshohet se së bashku me avokatin Ilir Pashaj kanë marrë 400 mijë lekë për lehtësimin e masës së dënimit për shtetasin Xh.M, I akuzuar për plagosje.

Gjithashtu edhe Taulant Ramollari është akuzuar për kryerjen e veprës penale të “Korrupsioni aktiv i gjyqtarit, prokurorit dhe i funksionarëve të tjerë të drejtësisë”, kryer në bashkëpunim.

Në korrik, avokati mbrojtës i gjyqtares Vyshka, Ndue Pjetra, pati deklaruar se vendimi i GJKKO për ta lënë në arrest shtëpie gjyqtaren, pasi dyshohet se ka kërkuar 400 mijë lekë ryshfet për uljen e masës së sigurisë të të burgosurit Xh.M., është i padrejtë.

Sipas Pjetras, gjyqtarja ishte e pafajshme dhe nuk ka pasur asnjë ndikim për ulje dënimi.

“Nuk ekziston ulje dënimi, as pagesë, asgjë. Nuk del në asnjë vend. Prokuroria nuk ka sjellë asnjë provë”, tha ai.