Muxhahedini 78-vjeçar Ali Mostashari e humbi jetën nga një arrest kardiak ditën e 20 Qershorit, kur policia zhvilloi aksionin në kampin e MEK.
Ky është përfundimi i ekzaminimeve të bëra nga Mjekësia Ligjore. Në raportin që Tv Klan e disponon ekskluzivisht, thuhet se vdekja i ka ardhur si pasojë problemeve në zemër, si dhe nga agravimi i organeve të tjera jetësore, për shkak të mostrajtimit mjekësor.
Anëtari i MEK humbi jetën ditën kur qindra forca policore vendosën të ndërhyjnë në kampin e MEK në Manzë, në zbatim të një vendimi gjykate, ku sekuestruan pajisje kompjuterike dhe servera, të cilat dyshohet se ishin përdorur në sulme kibernetike ndaj një vendi të 3-të.
Nga drejtuesit e MEK në Manzë u tha se viktima ishte qëlluar nga policia, por kjo deklaratë u përgënjeshtrua nga drejtuesit më të lartë policore dhe nga Ministria e Brendshme. Ndërkohë autopsia tregon se viktima kishte pësuar goditje në zemër.
“Ndryshimet organore janë pasojë e sëmundjeve nga të cilat ka vuajtur viktima. Shkaku i vdekjes së shtetasit Ali Mostashari ka qenë koronaroskleroza e avancuar me mekanizmin e infarktit të freskët të muskulit të zemrës.”
Sa i takon disa shenjave të konstatuara në trupin e viktimës, në raportin mjeko-ligjor thuhet se janë shkaktuar nga rënia në momentet e fundit të jetës.
“Dermishtjet e vërejtura në kokë, hundë dhe gjymtyrët e poshtme si edhe ekimozat e vërejtura në anën e djathtë të fytyrës me mundësinë më të madhe duhet të jenë shkaktuar si pasojë e rrëzimit në momentet e fundit të jetës.”
Ekspertët mjeko ligjorë kanë konkluduar se Ali Mostashari ka ndërruar jetë mes orës 10:00-12:00 të paradites së 20 Qershorit. Ekzaminimi i trupit të tij është bërë 8 deri 10 orë më pas.
Discussion about this post