Riad Sopjani është 20-vjeçari nga Kosova, i arrestuar ditën e sotme në qytetin e Durrësit. Mësohet se prej një viti ai ishte në kërkim, pasi për të janë lëshuar tre urdhra arresti nga Gjykata Themelore e Prishtinës.
Sopjani është arratisur nga Qendra Korrektuese e Lipjanit, në tetor 2020 pasi u ndalua nën akuzën e grabitjes, vjedhjes dhe trafikimit të qenieve njerëzore. Pas arrestimit në Durrës, pritet ekstradimi i tij në shtetin e Kosovës, mbështetur në “Konventën Evropiane të Ekstradimit” të vitit 1957.
Sopjani, ishte i dënuar më parë në Kosovë, për grabitje, vjedhje dhe trafikim të qenieve njerëzore. Shërbimet e Policisë, gjatë kontrollit të ushtruar në banesën ku ai strehohej në Durrës, gjetën dhe sekuestruan në cilësinë e provës materiale një sasi lënde narkotike cannabis sativa. Ndërsa më parë ishin bërë disa denoncime për të me akuza cenim të sigurisë publike dhe dhunë në familje.
