Mjeku i Traumës Fitim Marku, i cili u arrestua para pak ditësh me akuzën e korrupsionit, është në gjendje të rëndë shëndetësore. Ai ndodhet aktualisht në spital, ku do ti komunikohet masa e sigurisë. Mësohet se Marku ka pësuar ishemi cerebrale. Kujtojmë se mjeku anestezist ra në pranga më 23 shtator pasi dyshohet se ka marrë rryshfet për disa ditë me rradhë nga qytetarët në spital.
Uniformat blu e kanë monitoruar situatën e mjekut Marku pas denoncimeve nga pacientet për abuzim të detyrës nga ana e tij. Në këtë mënyrë, policia ka futur në spital një pacient (agjent i infiltruar), i cili i ofroi mjekut shumën prej 20 mijë lekësh, të cilën ai nuk e ka refuzuar.
Prokuroria e Tiranës nëpërmjet një deklarate për mediat ka njoftuar se gjatë aksionit të policisë me agjentë të infiltruar te Spitali i Traumës, përveç mjekut anestezistit Fitim Marku, në pranga kanë rënë edhe një kolege e tij mjeke dhe një infermiere.
Prokuroria sqaron se hetimi ka vijuar për disa javë dhe rezulton se këta punonjës të spitalit merrnin shuma të konsiderueshme parash në formë ryshfeti nga pacientët.
Discussion about this post