Hasim Musaraj (Murataj) u arrestua në kuadër të operacionit “Dhelpra e kuqe” në një bashkëpunim Interpol dhe policisë. 29-vjeçari kërkohej nga autoritetet italiane për vrasjen e një tjetër shqiptari, 39-vjeçarit Shpëtim Frashëri, krim i kryer në Itali.
Lidhur me vrasjen e Shpëtim Frashërit, në qershor të vitit 2020, u dënua me 12 vite burg një nga autorët, Donaldi Rushiti, i njohur me nofkën Doni.
Rushiti, menjëherë pasi ka kryer krimin ka ardhur në Shqipëri, por falë bashkëpunimit mes policisë shqiptare dhe asaj italiane, ai u kap në Tiranë, përpara dy vitesh. Pas ekstradimit, shqiptari mori dënimin nga Gjykata e Torinos.
Sipas policisë katër autorët e vrasjes së Frashërit janë: Hasim Murataj, Cerciz Banushi, Sabri Brakaj dhe Donaldi Rushiti.
Nuk dihen motivet që çuan 4 shqiptarët të vrasin bashkëatdhetarin e tyre, por dyshohet se gjithçka ndodhi për kontrollin e tregut të prostitucionit në vendin fqinj.
Viktima, sipas hetimeve, drejtuar nga prokurori Vito Sandro Destito, menaxhonte një rrjet të vogël prostitutash në zonën e De Sanctis.
Në mbrëmjen e krimit, Frashëri, i shoqëruar nga disa miq që ishin të panjohur, kishte pasur një konflikt me katër të pandehurit në lokalin “Chic”, i cili qëndron hapur 24 orë. Përleshja mes tyre ishte regjistruar nga kamerat në zonë.
Frashëri, i ndjekur në mes të rrugës, ishte goditur nga një e shtënë me pistoletë me kalibër 45. Disa plumba të lëshuar në drejtim të tij, kanë goditur ndërtesa rreth e rrotull zonës.
Mbrojtësi i Rushitit, avokati Enrico Calabrese, pohoi se i riu, i pashkolluar, ishte përfshirë në atë mosmarrëveshje të ngatërruar dhe ishte përpjekur të mbrohej.
Discussion about this post