Lavdosh Shehu, avokati i arrestuar disa ditë më parë me urdhër të SPAK, për “ushtrim i ndikimit të paligjshëm ndaj personave që ushtrojnë funksione publike”, ka apeluar vendimin e Gjykatës me justifikimin se nuk ka shkelur ligjin.
Nëpërmjet avokatit mbrojtës, Shehu ka depozituar ankimimin në Apel ku kërkon ndryshimin e masës nga “arrest me burg” në garanci pasurore. Sipas mbrojtësit, Shehu nuk ka konsumuar vepër penale, pasi ai ka proceduar konform të gjitha rregullave ligjore, për ekstradimin nga Italia drejt Shqipërisë të Fatos Hysenit, i dënuar me 30 vite burg për vrasje.
Në ankimim thuhet se Shehu, nuk ka takuar apo nuk ka ndërhyrë tek asnjë zyrtar apo punonjës në ministrinë e Drejtësisë, ku të gjitha komunikimet i ka kryer nëpërmjet email-it. Gjithashtu në ankimim thuhet se për 5000 mijë eurot që avokati i ka marrë Shqipe Hysenit, për punën e transferimit të djalit të saj, ai i ka kthyer asaj një shumë prej 900 eurosh. Ndërsa për 4100 euro ai ka lëshuar edhe faturë tatimore.
Lavdosh Shehu u arrestua pak ditë më parë me urdhër të Prokurorisë së Posaçme, pasi kishte kërkuar 12 mijë euro nga familja e Fatos Hysenit në mënyrë që të bënte të mundur sjelljen e tij në Shqipëri për të vuajtur dënimin në vendin tonë.
Discussion about this post