Sokol Bajgora, 54-vjeçari, i cili u dhunua në banesën e tij në fshatin Baltëz të Fierit nga disa persona të armatosur, ka treguar tmerrin që ka përjetuar nga ambientet e spitalit.
Ai tregon se është sulmuar nga 3 persona që kanë hyrë forcërisht në banesë për të vjedhur, por nuk arritën të vidhnin gjë.
““Isha në gjumë kur dëgjoj një zhurmë. Mendova se ishte ndonjë mace që hyri dhe që ranë pjatat e bufesë. Ata i kishin rënë derës prapa shtëpisë, i thyejnë xhamin. Kur dal nga dhoma e gjumit, ata erdhën me një elektrik dhe me armë. Tre veta hynë brenda. Direkt thanë lekët. Thashë s’kam lekë. Mungesa e energjisë elektrike e bëri situatën më të vështirë, pasi me tytën e armës, më godisnin pa pushim në kokë”, ka dëshmuar 54-vjeçari.
54-vjeçari ndodhet në spitalin rajonal te Fierit, ku dëmtimet me të mëdha i ka marrë në fytyrë, raporton për BalkanWeb gazetari Enea Verria. Ndërkohë që policia ka shoqëruar disa persona në lidhje me ketë ngjarje dhe po punon për zbardhjen e plotë të rrethanave dhe identifikimin dhe kapjen e autoreve.
Discussion about this post