Ajazi u shpall i fajshëm për 3 akuza në Gjykatën Supreme në Brisbane vitin e kaluar. Në to përfshihej edhe përkrahja e terrorizmit dhe pjesëmarrja në aktivitete armiqësore në një vend të huaj.
Muajin e kaluar, gjykata dëgjoi se 34-vjeçari, i cili jetonte në Gold Coast, udhëtoi në Turqi në vitin 2013. Nga viti 2014, ai bënte kalime të rregullta në kufirin sirian për të luftuar si ushtar në beteja “jashtëzakonisht të egra”.
Ajazi e bëri këtë për një periudhë dyvjeçare me qëllim për të rrëzuar me forcë qeverinë siriane dhe për të vendosur një shtet që qeveris sipas ligjit të Sheriatit.
Edhe pse kishin të njëjtin qëllim, u pranua se Ajazi nuk ishte anëtar i ndonjë grupi specifik terrorist. Avokati i tij argumentoi se ai vetëm një herë u shoqërua me grupin Jabhat al-Nusra.
Gjatë kësaj kohe, Ajazi bënte postime të rregullta në rrjetet sociale rreth prerjes së kokave të të burgosurve që kapeshin gjatë betejave. Megjithatë në asnjë moment nuk u pretendua se ai vetë ka kryer ndonjë ekzekutim.
Ajazi po ashtu inkurajonte amerikanët që të hynin në kishat ruse dhe të fillonin të prisnin koka.
Megjithatë, shqiptari ka filluar të pendohet. Ai e përshkroi sjelljen e tij në këtë kohë si për të kërkuar vëmendje dhe të papjekur. Tashmë ai mendon se organizatat terroriste janë hipokrite dhe u bëjnë lavazh truri të rinjve.
Gjykatësi i çështjes, tha se Ajazi ka treguar një nivel të arsyeshëm pendimi pavarësisht se një herë i tha një gazetari se luftimi në Siri ishte qejf. Deri më tani, Ajazi ka vuajtur 3 vite në paraburgim. Sipas mediave, në vitin 2026 ai mund të kërkojë lirinë me kusht.
Discussion about this post