Komisioni i Reformës Zgjedhore po zhvillohet ditën e sotme online.
Shkak për një masë të tillë është bërë bllokimi i mbledhjes fizike të martën nga deputetët e opozitës.
Bashkëkryetarët, Damian Gjiknuri dhe Enkelejd Alibeaj po mbajnë mbledhjen e konceptuar si një seancë dëgjimore me Organizatat e Shoqërisë Civile.
Prej disa kohësh zhvillimi i punës normale të këtij komisioni është ndërprerë, pasi deputetët e opozitës kërkojnë që bashkëkryetar në vend të Enkelejd Alibeaj të jetë Oerd Bylykbashi.
Bashkëkryetari Damian Gjiknuri është shprehur se është në dorën e aktorëve politikë nëse duan ta respektojnë ligjin zgjedhor apo ta prishin kur nuk marrin rezultatet që duan.
Ndër të tjera ai tha se Kodi Zgjedhor është i rafinuar dhe i njohur nga të gjitha palët, ndërsa shtroi se kontributi në komision duhet të jetë konkret nga të gjitha palët, duke iu drejtuar kështu organizatave të Shoqërisë Civile.
“Komisioni i Reformës Zgjedhore ka mandate të plotë, nuk lë asnjë hapësirë për keqinterpretim, madje është formuluar në mënyrë që të preken dhe tema për të cilat palët bien dakord. Kontributi në komision duhet të jetë shumë konkret.
Komisioni është gjendur në rrethana të vështira, por është një vullnet i mirë që të gjithë aktorët të kontribuojnë me produkte konkrete.
Nuk do shpikim rrotën këtu dhe s’do bëjmë asgjë nga e para. Kodi Zgjedhor është i rafinuar, i njohur nga të gjitha palët, nuk ka vështirësi në zbatimin zgjedhor, ligji është i barabartë dhe garanton zgjedhje të barabartë, këtë e ka thënë dhe komisioni i OSBE. A ka disa probleme në zbatim? Po, edhe mund të ketë, kjo është një çështje e maturimit të demokracisë dhe forcimit të institucioneve, dhe organizatat kanë një rol.
Ajo që mbetet më e rëndësishme është vetëdija e aktorëve politikë, që ta respektojnë këtë sistem, ta respektojnë ligjin zgjedhor, apo ta prishin kur nuk ju dalin rezultatet dhe kjo është një sëmundje e vjetër, megjithatë ne e kemi të vështirë ta atribuojmë këtë në komision”, tha Gjiknuri.
Bashkëkryetari tjetër Enkelejd Alibeaj, i ka tërhequr vëmendjen kolegut socialist Damian Gjiknuri duke i thënë se po flet më shumë seç duhet.
Gjiknuri e mohoi një gjë të tillë, duke thënë se foli në emër të Komisionit, por Alibeaj i kërkoi të flasë në emrin e tij, pasi marrja e kohës së grupeve të Shoqërisë Civile është e pahijshme.
Pjesë nga diskutimi:
Alibeaj: Jemi të dy bashkëkryetarë, që do të thotë i kemi të drejtat edhe në drejtimin e Komisionit, duhet të vendosim se janë të ndara përgjysmë. Sapo harxhuat më shumë kohë sesa premtuat.
Gjiknuri: U vu në pikëpyetje roli… Një nga detyrat e bashkëkryetarit është t’i japi legjitimitet dhe organit i cili qëndron dhe unë si bashkëkryetar mendova se fola dhe në emër të të tjerëve, megjithatë edhe kjo është bashkë drejtim.
Alibeaj: Flisni në emrin tuaj sepse nuk është e hijshme që ne i thërrasim organizatat e Shoqërisë Civile dhe pastaj t’i agresojmë në një farë mënyrë, nuk do të ishte e ndershme. As unë mund të mos jem dakord me konsideratat që Gogo tha në lidhje me procesin politik, por ne duhet ta dëgjojmë.
Discussion about this post