Kanë kaluar më shumë se një muaj nga koha kur fermerët e Fierit pësuan dëmtime të mëdha nga përmbytjet. Asaj kohe ata patën një takim me kreun e bashkisë, i cili iu premtoi se me urdhër të vetë kryeministrit, do të dëmshpërblehen. Por, pas kaq kohësh asnjë kompensim nuk kanë marrë, për këtë arsye ditën e sotme ata kanë dalë në protestë dhe i bëjnë thirrje Kryeministrit që të mbajë premtimin dhe të dëmshpërblejë dëmet që atyre u shkaktuan nga përmbytjet.
Në lidhje me situatën në të cilën ata ndodhen ka folur kryetari i sindikatës së Fermerëve të Bashkuar, Eduart Sharka, i cili ka bërë me dije se dhe pse kanë kaluar dy javë nga takimi me kryebashkiakun akoma nuk kanë marrë asnjë përgjigje dhe reagim nga pushteti vendor. Sipas tij duke u bazuar në hektarët e dëmtuar nga përmbytjet dëmi shkon deri në 400 mijë euro.
“Kanë kaluar dy javë nga takimi me kryebashkiakun që na premtoi ngritjen e një komisioni për të vlerësuar dëmet nga përmbytja dhe nuk ka akoma asnjë përgjigje. Është e papranueshme që theksoi se do të kërkonte konsultim për ligjin që ka dy vite që është futur në fuqi, ku pushteti vendor e ka për detyrë që të kompesojë dhe dëmshpërblejë fermerët. Sot ka kaluar një muaj dhe nuk ka ardhur askush për vlerësimin e dëmeve. Janë dëmtuar 300 hektarë sera me luleshtrydhe dëmi në 300-400 mijë euro sipas asaj që kemi vlerësuar ne. Ne kemi folur me ministren por ajo ka thënë se kompesimi dhe masat për të parandaluar përmbytjet është detyrim i pushtetit vendor”, ka thënë Sharka.
Në çdo vit përmbytjet në vendin tonë kanë shkarkuar dëme të mëdha, por asnjëherë fermerët nuk kanë marrë mbështetjen që meritojnë, duke bërë që veprimtaritë e tyre të reduktohen dhe ata të falimentojnë.
Discussion about this post