U dënua me 40 orë pune, kryebashkiaku Ismailaj nuk e pranon

Kryebashkiaku i Mallakastrës Qerim Ismailaj, i eshtë drejtuar me një kërkesë Gjykatës së Posaçme, ku kërkon pezullimin e ekzekutimit të dënimit.

Ai u dënua me 40 orë pune në interes të publikut. Qerimaj ka kërkuar pezullimin e ekzekutimit të dënimit deri në dhënien e një vendimi të formës së prerë edhe nga Apeli i Posaçëm.

Kërkesa e Ismailajt për pezullim të dënimit deri në nkë vendim përfundimtar do shqyrtohet më datë 28 shkurt, nga gjyqtarja e Posaçme Elsa Ulliri. Ismailaj u gjet fajtor për akuzën e falsifikimit të formularit të dekriminalizimit pasi nuk deklaroi një dënim të marrë në Greqi.

Pas dhënies së dënimit disa javë më parë kryebashkiaku tha se, nuk do të heqë dorë nga mandati i kryebashkiakut, ndërsa vendimin e cilësoi të pa drejtë. SPAK kërkoi dënimin me një vit burg ndaj Ismailajt.

Gjatë leximit të pretencës, prokurori Adnand Xholi kërkoi që dënimi me burg të pezullohet dhe të konvertohet në 150 orë pune në shërbim të komunitetit. Në fund gjykata e dënoi atë me 6 muaj burg, por këtë dënim e konvertoi në 40 orë punë në shërbim të publikut.

Ai  u mor i pandehur nga SPAK, për fshehjen e një dënimi me 3 vite burg në Greqi. Hetimet ndaj kryebashkiakut të Mallakastrës filluan pas denoncimit të Partisë Demokratike. Bëhet fjalë për një ngjarje të ndodhur në vitin 1999, ku Ismailaj ishte përfshirë në rrahjen e një personi në shtetin fqinj.

Nga hetimet ka rezultuar se, Ismailaj nuk e kishte deklaruar dënimin e marrë në shtetin grek, në formularin e dekriminalizimit.