Është përkeqësuar ditën e sotme gjendja shëndetësore e biznesmenit Namik Çangu, i cili natën e së shtunës u grabit dhe u torturua nga disa persona në banesën e tij. Mësohet se, për shkak të goditjeve në kokë, Çangu ka paraqitur probleme shëndetësore, ndërsa ka pasur dhe hemorragji.
Mësohet se mëngjesin e sotëm policia ka shkuar për ta ri pyetur, por ai nuk ka qenë në gjendje të fliste. Aktualisht familjarët po presin mbërritjen e autoambulancës për ta dërguar në spital për kontrolle më të detajuara.
Ndërkohë policia ka shoqëruar në komisariat personat me precedentë në fushën e vjedhjeve në zonë dhe po punon me kamerat e sigurisë për të përfituar karakteristika te autorëve.
Çangu ka treguar më herët para uniformave blu se ishte në gjumë në momentin që autorët janë futur në banesën e tij në Nikël të Fushë-Krujës. Ai ka rrëfyer se është lidhur dhe dhunuar nga persona të maskuar të cilët ishin në kërkim të çelësit të kasafortës. Autorët i kanë prerë njërin nga gishtat dhe i kanë shkaktuar fraktura të shumta në trup, ndërsa dyshohet se i kanë marrë rreth 100 mijë euro dhe disa sende me vlerë.
