Kushërinjtë Maja, të cilët u dhunuan nga pjesëtarë të fisit Rraja në muajin korrik 2023, kundërshtojnë akt-ekspertizën, që e klasifikon si plagosje të lehtë, dhunën e ushtruar ndaj tyre.
Kjo akt-ekspertizë është përdorur nga Prokuroria e Tiranës për të ndryshuar më pas akuzën e ngritur ndaj pjesëtarëve të fisit Rraja, nga “plagosje e rëndë me dashje” në bashkëpunim, në “plagosje të lehtë me dashje”.
Jashar Maja në një intervistë për Neës24 u shpreh se do të kërkojnë një tjetër ekspertizë, ndërsa shtoi se gjendja e tij shërndetësore vijon të jetë problematike, si pasojë e dhunës që u ushtrua ndaj tij me mjete të forta.
Jashar Maja tha se nuk është në gjendje të lëvizë, pasi ka marrje mendsh dhe probleme të tjera të shkaktuara si pasojë e goditjeve në kokë dhe pjesë të tjera të trupit.
“Jam shumë i zhgënjyer nga shteti shqiptar. Në mes të ditës thuhet nuk është dhunë. Po të ishte në një shtet tjetër do bëhej nami. Nuk e di ku të ankohem. Me atë mjek ligjor duhet të merret SPAK”, u shpreh Maja në intervistat televizive, një ditë pasi Prokuroria e Tiranës njoftoi akuzën e re ndaj pjesëtarëve të fisit Rraja.
Maja tregon si e mësoi për akt ekspertizën që e klasifikonte plagosje të lehtë.
“Personalisht isha në një rast vdekjeje. Familjarët më njoftuan. Më informoi edhe shefi i postës në Fushë Krujë, i cili më tha firmos që je njohur me akt-ekspertizën dhe unë se kam lexuar fare atë “, tha ai.
“Nuk besoj se do më jepet drejtësi. Çfarë verifkimi duan. Në mes të ditës, me sende të forta, armë. Ky prokurori nuk e sheh çfarë është ajo armë apo lodër, apo duan të tallen me mua me të dëmtuarin. Më keq sa nuk ka më. Unë kam marrje mendsh. Nëse ngrihem nga krevati më merren mend”.
Sa i takon kushëririt të tij Bilbilit, Jashari thotë se ai është operuar në Itali ku dhe do të udhëtojë sërish nesër për të kryer një operim të dorës.
“Bilbili do të shkojë në Itali të operojë dorën, ai ka fraktura akoma. Më keq sa nuk ka më. Është bërë operim në Itali, ndërsa nesër e pasnesër do të operojë dorën”, shprehet Jashari.
Ai thotë se pas dhunës askush nuk është interesuar më për të.
“Ore nuk na ka pyetur kush, cfarë halli ke…
Unë dua drejtësi nga shteti shqipar. Ose të thotë nuk kemi mundësi për të të mbrojtur, atëherë mbrohem vetë{, shprehet ai.
Discussion about this post