Prokuroria italiane ka marrë në pyetje biznesmenin Davide Pecorelli, i cili u gjet i gjallë dy ditë më parë, pas lajmit se mund të kishte ndërruar jetë në Shqipëri, që në ditët e para të janarit.
Ndërkohë që familjarët e kërkonin të vdekur në Shqipëri dhe Itali, biznesmeni u gjet i gjallë në një gomone në shtetin fqinj, ku po përpiqej të jetonte në fshehtësi larg vëmendjes së të gjithëve, ndoshta për shkak të borxheve të shumta që kishte marrë për shkaqe biznesi.
Mediat fqinje shkruajnë se gjëja e parë që ka thënë Pecorelli kur është përballur me kamerat, është se duhet të takonte fëmijët. Në momentin që gazetari i TGCom afrohet për ta pyetur, Pecorelli, i veshur me një palë pantallona të shkurtra, kapuç, syze dhe maskë anti-Covid, largohet me nxitim, duke thënë se duhet të shkojë tek fëmijët.
Pecorelli i kishte marrë të gjitha masat për të bërë një jetë të dytë, pasi kishte ndryshuar identitetin dhe siguruar dokumente rumune, por, mbetja pa para, do të bënte që 45-vjeçari të drejtohej në bankomat për të tërhequr të hollat që i duheshin.
Makina të cilën ai e kishte marrë me qira në Rinas, u gjet e shkrumbuar me 6 janar në Pukë, ndërsa brenda ishin vendosur disa eshtra që vonuan hetimin për disa muaj për shkak të analizave të ADNS-së. Biznesmeni tashmë pritet t’i kërkohen sqarime në Itali në lidhje me mënyrën se si u kthye atje, pasi sajoi zhdukjen në vendin tonë.
