Gjykata e Posaçme konfirmoi masën arrest në burg që ishte caktuar në mungesë për 31-vjeçarin Juxhin Koka i ekstraduar nga Spanja pasi SPAK e akuzon se ka korruptuar punonjësit e policisë dhe ka vjedhur bashkë me persona të tjerë 200 mijë litra naftë nga një anije që ishte ankoruar në portin e Durrësit në muajin janar.
Në seancën me dyer të mbyllura Koka nuk ka pranuar akuzën ndërsa mbrojtja e tij pretendoi se Koka nuk ka lidhje me vjedhjen e naftës dhe kërkoi një masë më të butë. Juxhin Kokës GJKKO i caktoi në shkurt të këtij viti masën ‘arrest në burg’ për tre akuza: Korrupsioni aktiv i personave që ushtrojnë funksione publike, kontrabanda me mallra për të cilat paguhet akcizë ose me pezullim të plotë apo të pjesshëm nga detyrimet doganore ose të akcizës dhe vjedhje kryer në bashkëpunim.
Më 13 tetor, SPAK mbylli hetimet dhe dërgoi për gjykim Juxhin Kokën dhe 10 të tjerë. Sipas organit të akuzës, Juxhin Koka, në bashkëpunim me Mohammed Sallit me detyrë kapiten i anijes, Nedio Mejdani me detyrë oficer i parë i anijes, dhe Hasan Broud, Sami Shanata, Faez Ismaeil e Wissam Rostom, marinarë të anijes me flamur tunizian që realizuan të gjithë veprimtarinë kriminale.
Nga hetimet rezultoi se Juxhin Koka dhe Drilon Malluta i ofruan 10.000 euro policit Armand Marvataj, që kishte për detyrë të ruante anijen e sekuestruar në Porto Romano, me qëllim që të lejonte nxjerrjen e sasisë së naftës së sekuestruar nga anija. Shuma e parave që polici kishte marrë ryshfet, u gjet dhe sekuestrua në banesën e Marvataj.
Nafta kontrabandë u nxor nga anija më 27 janar 2025 në bashkëpunim me ekuipazhin e anijes, Saimir Bayoume me detyrë inxhinier i tretë dhe përgjegjës teknik i anijes, marinarët, Hasan Broud, Sami Shanata, Faez Ismaeil, Wissam Rostom dhe Abdoulhaimen Shamata.
Discussion about this post