U gjet e pajetë në banesën e djegur, 52-vjeçarja në Pogradec dyshohet se është vrarë

Detaje të reja dalin në dritë nga ngjarja tragjike në Pogradec ku një grua u gjet e pajetë pasi u shkrumbua nga flakët banesa e saj.

Por, zjarri në banesë në lagjen 1 të Pogradecit dyshohet se është i qëllimshëm. Burime nga grupi hetimor sqarojnë se ngjarja dyshohet të jetë kriminale.

Nga këqyrja paraprake e trupit të viktimës, ekspertët mjeko ligjorë kanë konstatuar shenja të jashtme dhune. Deri më tani, pista e hetimit është ajo e vrasjes për motive pronësie.

52 – vjeçarja Kozeta Teço u gjet e pajetë sot në mëngjes në banesën e saj, e cila ishte e djegur.

Mësohet se në vendngjarje janë sekuestruar kamerat e sigurisë në dy objekte në afërsi të pallatit. Gjithashtu, janë shoqëruar disa persona në komisariatin e policisë së Pogradecit për t’u marrë në pyetje.