Vajza e cila u gjet e vdekur poshtë urës së Dajlanit në Durrës është identifikuar si Luljeta Preza.
Viktima, 32-vjeçe, u gjet paraditen e sotme, ndërsa në trupin e saj janë konstatuar prerje të shumta, që dyshohet se i kanë shkaktuar edhe vdekjen.
Policia ka shoqëruar 17 persona të cilët dyshohet se kanë dijeni për këtë rast. Viktima dyshohet se është vrarë nga persona që mund t’a kenë shfrytëzuar. Në trupin e viktimës janë konstatuar shenja të çarash në gjoks dhe në bark. Dyshimet janë se viktima ka humbur jetën si pasojë e hemoragjisë, edhe pse pritet një raport zyrtar mbi shkakun e vdekjes.
Viktima e sotme ishte arrestuar në vitin 2014 nën akuzën për veprën penale “ushtrim prostitucioni”, në kuadrin e një operacioni policor, bashkë me persona të tjerë.
Raportohet se ajo edhe tani punonte si punonjëse seksi.
Njoftimi i policisë:
Në lidhje me një informacion të dhënë paraditën e sotme, se rreth orës 10:35, në lagjen nr.13, Durrës, poshtë urës së Dajlanit, ishte gjetur pa shenja jete, një shtetase, ju informojmë se:
Nga verifikimet e kryera u bë i mundur identifikimi i kësaj shtetaseje, konkretisht u gjet e pajetë shtetasja L. P., 32 vjeçe, banuese në Sukth, Durrës.
Si rezultat i veprimeve hetimore të kryera paraprakisht nga grupi i posaçëm i ngritur për zbardhjen e kësaj ngjarjeje dhe nga ekspertët e mjekësisë ligjore, si dhe nga këqyrja e trupit të pajetë të 32-vjeçares, dyshohet se kjo shtetase e ka humbur jetën për shkak të dëmtimeve të marra në trup, nga një mjet prerës.
Deri më tani, në ambientet e Policisë së Durrësit, janë shoqëruar 17 shtetas të cilët dyshohet se kanë dijeni për këtë rast.
Grupi hetimor vijon hetimet e thelluara për të dokumentuar plotësisht rrethanat e këtij rasti, si dhe për të përcaktuar autorësinë e tij.
Discussion about this post