Detaje të reja kanë dalë rreth ngjarjes së tmerrshme që ndodhi dje ne Itali, ku u ekzekutua me thikë, avokatit shqiptar Aineo Redo, 48 vjeç. Ka folur sot për mediat miku i tij i ngushtë, i cili i tronditur nga ngjarja e rëndë ka rrëfyer me lot në sy takimin e fundit me të dhe pasionin që kishte për futbollin. “E kam parë Aineon për herë të fundit mbrëmë (të mërkurën) kur bëmë një lojë futbolli. U përshëndetëm rreth orës 23:30. Ai më tha shihemi në zyrë. Por të nesërmen, kur mbërrita, nuk ishte aty. Pastaj më telefonuan karabinierët”, tha avokati Mario Di Frenna. Më pas ai thotë se të gjithë klientët e donin avokatin shqiptar duke theksuar se ishte një njeri i ndershëm dhe gazmor.
“Aineon e donim të gjithë, vlerësohej nga klientët dhe komuniteti shqiptar, të cilin ai e ndihmoi shumë. Ai ishte avokat i zgjuar, i ndershëm, i dashur dhe gazmor. Ai nisi çdo gjë nga e para këtu pasi erdhi nga Shqipëria. Ndërtoi me sakrifica një rrugë të shkëlqyer në karrierë”, u shpreh ai. Në vitin 1996, avokati Redo, me origjinë nga Bulqiza, hipi në një gomone me rreth 30 bashkatdhetarë të tjerë dhe zbarkoi në Pulia. “Me vete kishte vetëm pasaportën dhe rrobat”, tregon Di Frenna. Në Itali e priti xhaxhai i tij dhe arriti të siguronte një leje qëndrimi pasi më parë kishte gjetur vend pune si bukëpjekës. Më pas gjeti punë në një fabrikë, ku bënte turnin e natës ndërsa u regjistrua në Fakultetin Juridik në Parma, ku u diplomua në vitin 2004.
Discussion about this post