Një efektiv policie është plagosur me thikë në Durrës këtë të enjte, gjatë detyrës. Efektivi është lënduar në dorë dhe raportohet se ndodhet jashtë rrezikut për jetën.
Sipas bluve, ngjarja ka ndodhur teksa polici ka ndërhyrë për të neutralizuar një person i cili lëvizte me thikë në dorë.
Ngjarja
Rreth orës 11:00, Policia njoftoi se ka marrë njoftim nga qytetarët, se në lagjen nr.1, një shtetas po lëvizte në rrugë me mjet prerës në dorë, duke u bërë rrezik për kalimtarët.
Shërbimet e Policisë kanë shkuar në adresën e dhënë ku kanë konstatuar shtetasin F.C., duke mbajtur një thikë në dorë.
“Gjatë ndërhyrjes së shërbimeve të Policisë, për neutralizimin e tij, është dëmtuar lehtë në dorë nga mjeti prerës punonjësi i Policisë E.C., i cili po merr mjekim në spital dhe është jashtë rrezikut për jetën”, thotë policia në një njoftim për rastin.
Shërbimet e Policisë e kanë shoqëruar shtetasin F.C., 38 vjeç, në Komisariat për veprime të mëtejshme, ndërsa mjeti prerës është sekuestruar në cilësinë e provës materiale, shtuan të njëjtat burime.
Discussion about this post