U hodh nga ura/ Kishte frikë se i refuzonin vizën, detaje nga hetimi për vdekjen e shqiptarit

Në muajin prill të vitit 2022, 37-vjeçari Mirsad Selgjekaj ndërroi jetë pasi u hodh nga ura në Britaninë e Madhe.

Ndërkohë së fundmi kanë dalë detaje të reja nga hetimet për vdekjen e emigrantit.

Sipas mediave britanike, i riu kishte patur vështirësi në zgjatjen e afatit të vizës, pasi kishte shkuar në Britani në vitin 2018. Por shëndeti i tij mendor u përkeqësua për shkak të shqetësimeve që kishte nëse do të mund të vazhdonte të qëndronte në këtë vend dhe nëse do të mund të zgjaste afatin e vizës së tij.

Mbrëmjen e 22 Prillit, Mirsadi fluturoi drejt Italisë, por u ndalua në kufi dhe iu refuzua hyrja. Ai u kthye me avion në Britani, rreth orës 06:00 të mëngjesit. Me telefonin e fikur pasi i kishte rënë bateria, Mirsadi nuk kishte mënyrë për të kontaktuar familjen e tij, e cila më vonë dëgjoi në lajme se një person kishte rënë nga ura.

37-vjeçari u shpall i vdekur në vendngjarje. Autopsia doli në konkluzionin se ai kishte humbur jetën si pasojë e plagëve të shumta që kishte marrë gjatë rënies. Në gjykatë u lexua një letër nga familja e shqiptarit në të cilën thuhej se në Shqipëri kishte pasur një jetë të lumtur dhe kishte punuar si shofer privat, se ishte shumë i lidhur me nënën dhe babain e tij dhe se kishte shkuar në Britani për të pasur një jetë më të mirë për veten.

“Nuk do ta kishim besuar kurrë që Mirsadi mund t’i jepte fund jetës, nuk ishte pjesë e karakterit të tij”, thuhej mes të tjera në letrën e familjes.