U kap duke ngrënë krudo/ Dëshmia e Xhevdet Plakut: Armën ma futi në çantë “Çoli”, më tha ‘mbaje pak’

Zbardhet dëshmia e të shumë kërkuarit, Xhevdet Plaku, i cili u arrestua nga policia e Durrësit, teksa po drekonte me 5 persona të tjerë, në një restorant luksoz në Gjirin e Lalëzit.

Plaku ishte arratisur nga burgu në Itali dhe kishte mundur të hynte në teritorin Shqiptar, ku qëndronte mjaft i qetë mes personave me precedent penale dhe të armatosur, duke konsumuar dreka e darka në restorantet më luksoze të bregdetit shqiptar.

Gjatë kontrollit të banesës së tij ku qëndronte me qira, Xhevdet Plakut, policia i janë gjetur dhe sekuestruar dy blloqe shënimesh, përmpajtja e të cilave ende nuk dihet, 1470 euro, 2500 lekë të reja si dhe katër telefona celularë.

Në momentin e arrestimit nga efektivët e policisë, Plakut i është kapur një pistoletë prodhim amerikan “SigSauerP320 M17”, të cilin ai e mbante në çantën e tij personale.

Por i kërkuari Plaku gjatë marjes në në pyetje në policinë e Durrësit, ka shpjegur duke gënjyer grupin e hetimit se pistoleta nuk i përkiste atij, por një personi tjetër me nofkën “Çoli”.

Në rrëfimin e tij, Xhevdet Plaku ka treguar se:

”…nuk kam pasur armë me vete dhe nuk kam pasur dijeni që ndonjëri nga personat që ndodheshin në shoqërinë e time në tavlinë, kishte armë zjarri ose ishin në kërkim nga policia. Nga personat e pranishëm në lokal njoh vetëm Voltan Xhanin dhe vëllain e tij, me emrin Gert Xhani, si dhe një tjetër person që e thërrisnin “Çoli”, emrin e të cilit nuk e di. Të tjerët nuk i njoh dhe nuk kam pasur ndonjë lidhje me ta…”.

Më tej Xhevdet Plaku ka treguar si më poshtë vijon:

“…është e vërtetë që arma u gjet në çantën time, por ajo nuk më përket mua. Pasi pak para mbërritjes së policisë, personi i njohur me emrin “Çoli”, ma ka dorëzuar pistoletën duke më thënë: “…mbaje pak te çanta….”. Unë e futa brenda pa ditur për pasojat…”.

Sipas tij, këtë fakt e ka konfirmuar verbalisht edhe vetë personi me nofkën “Çoli”, përpara punonjësve të policisë në momentin kur arma është gjetur gjatë kontrollit.

Ndërkohë lidhur me gjetjen e dy aparateve celularë në çantën e tij dhe katër të tjerëve në banesën familjare, Xhevdet Plaku, deklaroi se telefonin që kishte me vete nuk e di si hapet, pasi nuk e njeh kodin.

Ndërsa për sendet e tjera të gjetura në banesën e prindërve të tij ka deklaruar se nuk është në dijeni, pasi prej rreth gjashtë vitesh nuk ka shkuar në atë banesë, për shkak se ka qenë rezident në Itali dhe ndodhet në Shqipëri vetëm prej pak ditësh.

/Ora News/