Elton Qyno
Prokuroria e Tiranës ka mbyllur hetimet për Albert Prendin, i cili u ndalua me dy pistoleta, teksa drejtonte makinën tip BMW në pronësi të një ish-deputeti të Kuvendit të Shqipërisë.
Prendi ishte duke drejtuar makinën në zonën e Yzberishtit, kur një patrullë policie e komisariatit nr.6, i bëri shenjë të ndalonte. Teksa Albert Prendi ka ndaluar ai është kontrolluar fizikisht por në trup nuk ju gjend asnjë send i paligjshëm.
Ndërsa kontrolli ka vijuar në ambientet e makinës, policia konstatoi dhe sekuestroi dy pistoleta.
Gjatë marrjes në pyetje, Albert Prendi pretendoi se dy armët e zjarrit i kishte gjetur në rrugë dhe po shkonte në komisariat t’i dorëzonte.
Por kjo alibi nuk është besuar nga policia, e cila në muajin tetor 2022, i komunikoi arrestin Prendit duke ja përcjell rastin për hetim të mëtejshëm Prokurorisë së Tiranës.
Përmes ekspertizës balistike, hetuesit e çështjes zbuluan se të dyja armët ishin teknikisht në gjendje pune dhe kryenin qitje normale. Ndërsa për sa i përket ekzaminimit të gjurmëve të gishtave të personave të tjerë, ekspertiza nuk ka konstatuar asnjë gjurmë papilare në trupin e pistoletave.
Njëherësh sipas sistemit “Arsenal” që përmban gjurmët e gëzhojave, rezultoi se dy pistoletat nuk janë përdorur në ndonjë ngjarje kriminale të ndodhur në Shqipëri.
Nisur nga kjo situatë tashmë çështja ndaj personit të arrestuar Albert Prendi, është dërguar në gjykatën e Tiranës, ku miku i ish-deputetit do përballet me akuzën e “Prodhimit dhe mbajtjes pa lejë të armëve të zjarrit dhe municioneve”.
Discussion about this post