U kap me 450 kg marijuanë/ Jepet vendimi për “Zonjën e drogës”, me sa vite u dënua shqiptarja

Jona Mullaraj shqiptarja e ashtuquajtur “Zonja e drogës”, është dënuar me 3 vite e 8 muaj burg nga Gjykata Italiane, pasi u kap me 450 kilogram drogë.

Mullaraj e cila shpesh ishte parë në shoqërinë e politikanit të njohur italian Mateo Salvini si dhe kishte bërë fushatë për partinë e tij “Lega Nord” u arrestua në dhjetor të vitit të shkuar nga autoritete italiane, pasi u kap duke transportuar 450 kilogram lëndë narkotike të llojit hashash dhe marijuanë.

Droga u gjet në një garazhin e Cesano Maderno në via de Medici, ku ishte marrë me qira dhe kontrata ishte nënshkruar nga një grua tjetër, shkruajnë mediat italiane.  Pronari i magazinës ku mbahej lënda narkotike, u shpreh në atë kohë se Jona Mullaraj vinte shpesh për të marrë çelësat.

Gjykata ka dënuar gjithashtu Bruno La Marca me 3 vjet e 10 muaj,  Alessandro Barbieri me 3 vjet e katër muaj si dhe Rosario Abbene me një vit e gjysmë, që ishin pjesë e bandës së Mullarajt.

Ndërkohë pas dhënies së dënimit avokati i Mullarajt ka deklaruar se do të ankimojë vendimin.