Roxhensa Kapurani, e njohur si Marina Fara, vajza e këngëtares së njohur Eli Fara, është lënë në masën e sigurisë “arrest shtëpie” nga Gjykata e Tiranës. 39-vjeçarja u arrestua më 21 gusht nga forcat “Shqiponja” në Vorë, pasi u kap me një sasi kokaine në automjetin e saj.
Sipas njoftimit zyrtar të Policisë së Tiranës dhe informacioneve shtesë të siguruara nga mediat, Fara u ndalua gjatë një kontrolli rutinë teksa udhëtonte e vetme. Gjatë kontrollit fizik, iu gjetën 4.4 gramë kokainë, e ndarë në katër doza. Hetuesit dyshuan se sasia ishte e destinuar për shitje.
Megjithatë, para trupës gjykuese, Fara, e përlotur, deklaroi se lënda narkotike ishte për përdorim vetjak dhe jo për shitje. Pavarësisht këtij pretendimi, Gjykata vendosi masën e sigurisë “arrest shtëpie”, duke e liruar nga qelia.
Ky nuk është incidenti i parë i Marina Farës me drejtësinë. Në vitin 2020, ajo u përfshi në përgjimet e operacionit policor “Mezhgorani”, ku u arrestuan dhjetëra persona për trafik droge. Asokohe, ajo dyshohej se kishte ndihmuar dy persona t’i shpëtonin policisë, por u la me masën “detyrim paraqitje” pasi nuk u gjetën prova që e implikonin drejtpërdrejt.
Marina Fara, vajza e vetme e këngëtares së mirënjohur Eli Fara, është një figurë e njohur në mediat rozë. Ajo ka tërhequr shpesh vëmendjen për stilin e saj të jetesës, udhëtimet luksoze dhe aktivitetet në rrjetet sociale. Ende nuk ka pasur një reagim publik nga nëna e saj, Eli Fara, lidhur me këtë ngjarje.
Discussion about this post