Një 26-vjeçar shqiptar u dënua me 16 muaj burgim dhe me shumë gjasa me një dëbim nga Britania e Madhe, pasi u kap në një fermë kanabisi.Shqiptari mund të vuajë gjysmën e dënimit, pra 8 muaj burg dhe më pas të përballet me largimin e detyruar të tij nga ishulli.
Shqiptari i identifikuar si Feti Spahiu u arrestua nga policia në Newport, në zonën e Risca, pak para Krishtlindjeve. I pandehuri punonte si kopshtar në në një ndërtesë, e përshtatur si fermë kanabisi, ku në të paktën 5 dhoma kultivoheshin narkotikë.
Shqiptari u pëball me gjykimin në Newport Crown Court, ndërsa hetuesi Megan Jones e cilësoi si një organizim i sofistikuar, me ventilim dhe ndriçim, ambientin e përshtatur për kultivimin e kanabisit.
I pandehuri ishte i vetmi person që u gjet në adresë.
“Ai i tha policisë se erdhi në Mbretërinë e Bashkuar ilegalisht me një gomone nga Franca në vitin 2022. I pandehuri jetonte në Londër përpara se të sillej në Newport gjashtë javë para arrestimit të tij.
Ai tha se ishte kërcënuar për familjen e tij. I pandehuri tha se nuk mund të jepte përshkrime të këtyre njerëzve.
Spahiu u deklarua fajtor për prodhimin e kanabisit. Veprat penale janë kryer më 22 dhjetor 2023. Ai nuk ka asnjë dënim të mëparshëm. I pandehuri e ka ndjekur procedurën me ndihmën e një përkthyesi shqip”, raportojnë mediat, referuar gjykimit të shqiptarit.
Avokati Stuart John, i kërkoi gjykatës t’i jepte lehtësira klientit të tij për pranimin e fajit.
Avokati shtoi se “ai luajti një rol të kufizuar nën drejtim. Ai ishte kopshtar dhe përdorej nga njerëzit më lart në zinxhir. I pandehuri është përdorur si emigrant i paligjshëm. Kur të lirohet, thotë se do të kthehet menjëherë në Shqipëri”.
Gjykatësi, Recorder Sean Bradley, tha se ky ishte një operacion profesional me një sasi të konsiderueshme droge për përdorim komercial.
“Pranohet se keni marrë pagesë të kufizuar për rolin tuaj”, tha gjykatësi.
Discussion about this post