Dy net më parë, Fatjon Murati u shoqërua dhe më pas u prangos në Drejtorinë e Policisë së Tiranës. Kjo pasi gjurma e tij e gishtit ishin gjetur në një prej dhjetra armëve që u gjetën në dy depot e zbuluara gjatë operacionit “Ruger”, i cili çoi në pranga Kristian Gjinin dhe Françeska Kolgjeja.
Policia e Tiranës shoqëroi mbrëmjen e së shtunës, Endrit Doklen, Gentjan Reçin dhe Fatjon Muratin, të cilët u kapën teksa lëviznin në Tiranë me një automjet të blinduar. Dokle dhe Reçi pasi dhanë shpjegimet e kërkuara nga Policia u lanë të lirë, ndërsa Fatjon Murati ndodhet në burg për akuzat për armëmbajtje pa leje. Ai dyshohej se ishte bashkëpunëtor i Kristian Gjinit, i cili u arrestua në korrik të këtij pas zbulimit të një arsenali armësh në kryeqytet.
Sipas dëshmisë së siguruar nga Ora News, Fatjon Murati ka mohuar të ketë lidhje me arsenalin e armëve të gjetura. Ai ka thënë se armët nuk janë të tij dhe nuk ka dijeni se si gjurma e gishtit të tij ndodhej në një prej kutive të pistoletave, duke dhënë edhe një version të tijin.
“…armët nuk janë të miat dhe s’kam asnjë lidhje me to. Jam i paqartë se në çfarë rrethana është ndodhur gjurma ime e gishtit në një prej kutive, ku mbahej pistoleta, por jam i bindur se gjithçka është aksidentale. Unë kam njohje me të arrestuarin Kristjan Gjini, dhe para disa kohësh këtij personi ja kam marrë borxh makinën. Makinën në pjesën e pasme të saj, e kam pastruar duke hequr disa kuti letre, por pa e ditur se çfarë kishte brenda tyre. Besoj shumë, se ky ka qenë momenti ku mund të kem lënë shenjën e gishtit në kutinë e gjendur në banesën e Kristjan Gjinit…,”- tha ai. Ndërkohë që Murati gjithashtu ishte shpallur në kërkim për t’u marrë në pyetje lidhur me masakrën e Fushë Krujës, ku mbetën të vdekur tre persona, mes tyre edhe Brilant Martinaj.
Armët e gjetura në depot në Tiranë ndërkohë janë dërguar për verifikime në laborator, për të mësuar nëse janë përdorur në ngjarje kriminale, apo nëse kanë shenja të tjera gishtash.
Discussion about this post