Pesë persona kanë rënë në prangat e policisë në Shkodër pasi janë kapur duke mbjellë drogë. Mes tyre është edhe një i dënuar më parë për vrasje.
Policia njofton se bëhet fjalë konkretisht për personat e identifikuar me iniciale Ll. L., 55 vjeç, banues në Rubik, i dënuar më parë për vrasje, K. N., 19 vjeç, banues në Fushë Arrëz, D. N., 18 vjeç, M. N., 48 vjeçe dhe Gj. L., 55 vjeçe, të tre banues në Rubik.
Shërbimet e Policisë, bazuar në informacionet e grumbulluara më parë, kanë ushtruar kontroll në territorin e fshatit Ars, ku kanë konstatuar 27 bimë narkotike të kultivuara në një zonë të pyllëzuar.
Në vijim të kontrollit në zonën përreth, në një kasolle të improvizuar u gjetën 5 të arrestuarit të cilët po përgatisnin bimët narkotike për tharje. 25 kilogramët e bimëve në proces tharjeje u sekuestruan në cilësinë e provës materiale.
