U kapën me 500 kg kanabis, jepet vendimi për 7 të arrestuarit

Gjykata e Vlorës ka lënë pas hekurave 7 personat e arrestuar, si dyshuar të përfshirë në një grup kriminal të trafikut të drogës.

Në qeli janë lënë:

Idriz Meminaj, 39 vjeç, banues në fshatin Trevllazër;

Romir Meminaj, 49 vjeç, banues në fshatin Trevllazër;

Emanuel Meminaj, 22 vjeç, banues në fshatin Trevllazër;

Nertin Gjoni, 39 vjeç, banues në fshatin Babicë;

Xhuljano Gjoni, 30 vjeç, banues në fshatin Babicë.

Laurent Likaj, 37 vjeç, banues në Vlorë;

Altin Meçi, 50 vjeç, banues në Patos.

Dyshohet se të arrestuarit do të trafikonin një sasi prej rreth 500 kg kanabis drejt shtetit turk në rrugë detare.

Droga u kap brenda një furgoni në lagjen “11 Janari” gjatë një operacioni policor. Sasia e kanabisit, në formë boçeje ishte vendosur në 34 pako të madhësive të ndryshme, me peshe totale 500 kilogramë.

Sipas unifromave blu, droga është përpunuar dhe ambalazhuar në magazinën e dy vëllezërve Idriz Meminaj, 39 vjeç, dhe Romir Meminaj, 49 vjeç, banues në fshatin Trevllazër.

Më pas me automjetin e drejtuar nga shtetasi Nertin Gjoni, po e dërgonin në afërsi të vijës ujore, për ta transportuar më pas drejt Turqisë.

Por furgoni i mbushur me drogë është bllokuar nga policia në lagjen “11 Janari”.  Operacioni i koduar “RESET” ka vijuar me kontrollin e  magazinës, në fshatin Trevllazër, ku janë kapur në flagrancë dy vëllezërit Idriz Meminaj dhe Romir Meminaj.

Gjithashtu, në vijim të operacionit janë kapur dhe disa shtetas të përfshirë në këtë rast, si dhe vijon puna intensive për kapjen e shtetasve të tjerë të shpallur në kërkim.

Gjatë kontrolleve në banesa janë gjetur dhe sekuestruar 2 armë zjarri, 4 automjete dhe 8 celularë.