Gjykata e Durrësit ka caktuar masën e sigurisë ‘arrest me burg’ për 7 të arrestuarit në lidhje me 61.5 kg kanabis që u sekuestruan në aksin rrugor Vorë-Fushë Krujë.
Në dosjen hetimore që çoi në arrestimin e 7 personave që tentuan të trafikonin një sasi droge por u zbulua edhe shitja e armëve. Këta persona u arrestuan me armë dhe drogë tre ditë më parë në aksin Vorë Fushë-Krujë. Në dosjen hetimore thuhet se një ndër personat e arrestuar, Korab Cala, i cili thuhet se është dhe drejtuesi i grupit, ka kryer aktivitet kriminal kryesisht në gjetjen, grumbullimin dhe me pas shitjen e armëve dhe lëndës narkotike me qëllim përfitimi.
Bëhet fjalë për shtetasit; Korab Cala, Anton Gjini, Gerald Sema.
Cala, thuhet se ky shtetas aktualisht disponon armë të ndryshme si pistoleta me mulli dhe automatik model 56.
Në dosjen në fjalë, përmes përgjimeve, Cala shprehet se kërkon që të shesë një armë zjarri të llojit pistoletë me mulli në vlerën e 1200 eurove, një armë zjarri automatike në vlerën e 800 eurove dhe 1 kg hashash në vlerën e 1600 eurove.
“Sa do, do 100, 200, 500 kg hashash. Po edhe armë kemi plotë, mund të siguroj 10 pistoleta Glok dhe 10 kallash por pasi të kemi mbaruar punë me hashashin”, thuhet në një prej bisedave të zbardhura në dosjen hetimore.
Masa ‘arrest në burg’ u dha edhe për Gerald Lalën, Alfred Sefën si dhe Klevis Metallën. Kujtojmë se droga u kap e ndarë në tre automjete në këtë aks.
