Një 28 vjeçar është arrestuar pas një konflikti me tre persona në një lokal në Elbasan. Ngjarja ka ndodhur në lagjen “5 Maji”. I riu ishte në gjendje të dehur kur është konfliktuar me tre vëllezërit për motive të dobëta.
Pas sherrit, ai ka thyer edhe xhamin e derës së lokalit ku ndodhi ngjarja. Gjithashtu, policia njofton se nën hetim janë vënë edhe tre shtetasit e tjerë që u konfliktuan me 28 vjeçarin.
Njoftimi i policisë
Specialistët për Hetimin e Krimeve të Komisariatit të Policisë Elbasan, menjëherë pas marrjes së njoftimit për një konflikt mes disa shtetasve, në ambientet e një lokali, në lagjen “5 Maji”, kanë organizuar punën dhe kanë shkuar në këtë adresë, me qëllim sqarimin e rrethanave të konfliktit dhe nxjerrjen përpara përgjegjësisë penale, të shtetasve përgjegjës.
Si rezultat i veprimeve të shpejta policore u bë kapja dhe arrestimi i shtetasit O. S., 28 vjeç, banues në Elbasan, pasi duke qenë në gjendje të dehur, në ambientet e lokalit, është konfliktuar fizikisht, për motive të dobëta, me shtetasit I. M., A. M. dhe B. M. (vëllezër), si dhe ka thyer xhamin e derës së këtij lokali. Gjithashtu, në vijim të veprimeve procedurale për këtë rast, u referuan materialet në Prokurori ku nisi procedimi në gjendje të lirë për 3 shtetasit e tjerë të përfshirë në konflikt, I. M., 31 vjeç, A. M., 22 vjeç dhe B. M., 33 vjeç, banues në Elbasan.
Discussion about this post