Nuk ka ende asnjë gjurmë nga trupi i pajetë i të miturit që u mbyt në lumin Fan të Mirditës. Ndërkohë, në ditën e 10 të zhdukjes së 10-vjeçarit vijojnë kërkimet nga grupi i kërkim shpëtimit nga reparti RENEA Shkodër, si dhe banorët e zonës, por pa rezultat.
Në familjen e 10-vjeçarit janë hapur dyert e mortit, ndërsa familjarët janë të rënduar psikologjikisht. Një i afërm i familjes apelon për ndërhyrje me mjete të specializuara, duke kërkuar ndihmë vendeve nga rajoni.
Banorët apelojnë për forca më të shumta, sikundër dhe përfaqësues dhe drejtuesit vendorë të dalin në terren të organizojnë punën në kërkim te 10-vjeçarit.
5 ditë më parë u zhvilluan kërkime në urën aty pranë, e prishur prej disa kohësh, pasi dyshohej se trupi i të miturit mund të kishte ngecur në të. Por jo, deri në momentin që u mbyllën kërkimet nuk u gjet asgjë.
10-vjeçari u mbyt pasi ishte duke luajtur me shokët e tij dhe i përfundoi topi në lumë. Topi për të cilin rendi i mituri dhe u mbyt u gjet, 20 km larg vendit ku luanin fëmijët.
Pjesë e kërkimeve ishin 17 palombarë të ardhur nga Tirana si dhe banorët e zonës të cilët dolën vullnetarë për të ndihmuar në gjetjen e trupit të të miturit, por pa rezultat.
Discussion about this post