Nëna e Gerti Shehut, 31-vjeçarit i cili goditi me grusht Sali Berishën ka lënë ambientet e Komisariatit nr. 1 ku po merrej në pyetje.
Largimi i saj është bërë me një ambulancë për shkak se nuk ishte ndjerë mirë nga ana shëndetësore.
Ermira Kaçaçi tha se i biri vuante nga probleme të shëndetit mendor. Për këtë ajo dha shpjegime edhe në komisariatin numër 1, aty ku dhe u shoqëruar Shehu. Mjeku psikiatër Sadil Lala tha se dokumenti që ai ka lëshuar lidhur me diagnozën e Gert Shehut cili sulmoi fizikisht Sali Berishën, është autentik. Lala tregoi se e ka mjekuar që në vitin 2018 dhe sipas tij gjendja është agravuar sepse nuk do të ketë marrë mjekim.
Çfarë ndodhi sot?
Gerti Shehu, 31-vjeç sulmoi mesditën e sotme kreun e PD-së Sali Berisha, teksa ky i fundit ishte duke marshuar drejt bulevardit “Dëshmorët e Kombit” për të marrë pjesë në protestë. 31-vjeçari goditi me grusht në fytyrë Berishën duke e gjakosur. Ai u ndalua menjëherë nga truprojat e Berishës dhe ndërkohë u dhunua nga mbështetës dhe simpatizantë të PD-së.
31-vjeçari u shoqërua nga policia dhe aktualisht po merr mjekim në spitalin e Traumës, pasi ka dëmtime në fytyrë dhe fraktura në hundë. Oficerët kanë tentuar dy herë për të marrë në pyetje të riun, por për shkak të gjendjes së tij shëndetësore, ai nuk ka dhënë deri tani asnjë dëshmi. Dyshohet se 31-vjeçari vuan nga probleme të shëndetit mendor.
Discussion about this post