Detaje të reja janë zbuluar në lidhje me arrestimin nga policia e Korçës të ish-drejtoreshës së Mjedisit në Tiranë, Viola Sterjo. Sterjo dyshohet se ka mashtruar 5 subjekte, duke u marrë shuma që variojnë nga 20 mijë deri në 90 mijë euro.
Ajo u ka premtuar bizneseve se në këmbim do të përdorte influencën e saj në politikë që këta të fundit të përfitonin nga fondet e AZHBR-së.
Subjektet kanë paguar ryshfetin kundrejt premtimit për dhënien e fondeve që variojnë nga 1 milion deri 4 milionë euro.
Ndërkohë policia në njoftimin zyrtar sqaroi se: “Ndalimi i saj u bë pasi, Gjykata e Shkallës së Parë Korçë, me vendimin e datës 26.12.2022, ka caktuar për këtë shtetase masën e sigurisë “Arrest në burg”, për veprën penale “Mashtrimi”, me pasoja të rënda. Nga hetimet e kryera rezulton se në periudhën mars-nëntor 2020, nëpërmjet mashtrimit, V. S., dyshohet se ka përfituar në qytetin e Korçës, një shumë të konsiderueshme monetare, me qëllim ndikimin e saj në institucione shtetërore, që qytetarë të ndryshëm të përfitonin fonde monetare nga shteti”.
Discussion about this post