U nis të digjte mbeturinat në oborr, 67 vjeçarja pëson djegie

Një 67 vjeçare ka përfunduar në spital pasi u dogj nga një zjarr që ndezi në oborrin e shtëpisë në fshatin Tamarë të Malësisë së Madhe.

Sipas policisë, e moshuara e kishte ndezur zjarrin për të djegur disa mbeturina në oborr por ata janë përhapur duke rrezikuar shtëpinë.

67 vjeçarja dyshohet se, në tentativë për të parandaluar përhapjen e flakëve të zjarrit, ka pësuar djegie të lehta.

Si pasojë, shtetasja po merr ndihmë mjekësore në spital dhe ndodhet jashtë rrezikut për jetën. Ndërkohë, grupi hetimor po punon për zbardhjen e rrethanave të ngjarjes.

Njoftimi i Policisë:

Malësi e Madhe/Informacion paraprak.

Në fshatin Tamarë, shtetasja L. T, 67 vjeçe, ka pësuar djegie të lehta, dyshohet gjatë përpjekjes për të parandaluar përhapjen e flakëve të zjarrit që kishte ndezur në oborrin e banesës për djegien e disa mbeturinave.

Si pasojë, shtetasja L. T, po merr ndihmë mjekësore në spital dhe ndodhet jashtë rrezikut për jetën.

Grupi hetimor po punon për zbardhjen e rrethanave të ngjarjes.