U plagos në koncertin “Astroworld”, vdes 9-vjeçari që ndodhej në koma

Një djalë 9-vjeçar, i cili pësoi lëndime të rënda gjatë festivalit “Astroworld” më 5 nëntor në Teksas u bë viktima e 10-të e tragjedisë.

Ezra Blount kishte qenë në mbështetje të jetës në spital për shkak të traumës së rëndë të trurit dhe organeve që nga dita e aksidentit në shfaqje më 5 nëntor.

I mituri ndodhej në koma prej disa ditësh po ndërroi jetë të dielën në spitalin e fëmijëve në Hjuston, konfirmoi avokati i familjes.

9-vjeçari kishte shkuar me prindërit e tij në koncertin e reperit amerikan Travis Scott, ku u shkel nga turma. Prindërit e tij kanë paditur reperin për neglizhencë dhe kanë kërkuar të paktën 1 milion dollarë dëmshpërblim.

Në një intervistë të mëparshme me gazetën lokale “ABC13”, babai i Ezra-s, Treston Blount tha se ai “nuk ishte gati të humbiste djalin”.

“Ne kemi ende një jete për të bërë”, tha ai, duke përshkruar sesi djali i tij ishte një fans i madh i Scott-it, i cili ishte “i ngopur” përpara performancës.