Glauk Olldashi, djali i ish-ministrit të ndjerë Sokol Olldashi, është shfaqur në foltoren e Berishës duke shfaqur hapur suportin e tij për ish-kreun e PD-së.
Gjatë një interviste televizive, Olldashi është pyetur përse po mbështet Berishën, kur ky i fundit nuk e mbështeti babanë e tij, Sokol Olldashin në zgjedhjet për kreun e PD-së, pas dorëheqjes së Berishës në 2013-ën.
“Jeta është një ironi e vërtetë”, u përgjigj Olldashi, teksa shtoi se Berisha është i vetmi që mund të nisë një PD ndryshe ku forumet funksionojnë.
Olldashi theksoi se ai mbështet më shumë kauzën se individin, duke argumentuar se Berisha po zhvillon një kauz që është ngritur shumë herë nga demokratë që nuk kanë patur fuqinë e duhur politike për të korrur sukses.
“Sa i përket mbështetjes së forumit rinor ndaj doktorit nuk është thjesht si individ, por është më shumë mbështetje ndaj kauzës që ai ka marrë përsipër të na drejtojë. Një kauzë që është ngritur jo pak herë nga ne, por nga shumë aktivistë të PD, që sot nuk janë më pjesë e saj fatkeqësisht. Deri tani asnjë nga ne nuk ka patur fuqinë e duhur politike për ta kthyer këtë kauzë në një lëvizje të suksesshme.”
Olldashi shtoi se ai që nisi demokracinë dikur, për ironi të fatit është po i njëjti që mund të nisë një tjetër etapë në Partinë Demokratike dhe shqiptarët.
“E thënë pak më ndryshe, do të ishte që, ai që filloi etapën e demokracisë në vendin tonë, për ironi të fatit është edhe ai që ka mundësinë më të madhe që ta mbyllë këtë etape dhe të nisë një PD ku forumet funksionojnë, ku kryesia e partisë është funksionale dhe një PD që frymëzon demokratët dhe është shembull, jo vetëm për demokratët por të gjithë shqiptarët.”
Discussion about this post