Para pak ditësh u raportua një ngjarje aksidentale në Dibër, ku 60-vjeçari me inicialet N. B. Humbi jetën. Por pas një hetimi të thelluar u zbulua se viktima kishte humbur jetën pasi u rrëzua me kokë në tokë pas një konflikti me një person. Më 26 qershor, ditën kur ndodhi ngjarja, personat dëshmitar raportuan se viktima ishte pasagjer në një makinë dhe teksa po zbriste nga mjeti është rrëzuar duke dëmtuar kokën. Ai u transportua tek Trauma në Tiranë por nuk arriti të mbijetonte.
Por, pas një hetimi të thelluar të policisë, u zbulua se pranë lokalit të personit me inicialet L. K., banues në Peshkopi, një konflikti për motive të dobëta, personi tjetër me iniciale O. T, 53 vjeç, banues në fshatin Shimçan, Dibër, e ka shtyrë viktimën, i cili është rrëzuar në tokë, duke marrë dëmtime të rënda, si pasojë e të cilave humbi jetën në spital, mbrëmjen e datës 28.06.2022.
Policia ka arrestuar 53-vjeçarin O.T, gjithashtu ka proceduar penalisht në gjendje të lirë për personat: E. T., 48 vjeç, L. K., 52 vjeç dhe A.T., 63 vjeç, për veprën penale “Moskallëzimi i krimit”.
Autori O. T. dhe 3 personat e tjerë të proceduar në gjendje të lirë, në datën 26.06.2022, deklaruan se ngjarja ka ndodhur në mënyrë aksidentale, ku sipas tyre 60-vjeçari, N. B., duke zbritur nga automjeti i parkuar i personit E. T., ishte rrëzuar aksidentalisht dhe për pasojë ishte dëmtuar në kokë.
Më pas, në bazë të dyshimeve të krijuara për rrethanat e kësaj ngjarjeje, bazuar dhe në informacionet e siguruara në rrugë operative, në bashkëpunim me Prokurorinë pranë Gjykatës së Shkallës së Parë Dibër, u bë regjistrimi i procedimit penal për veprën penale “Plagosja e rëndë me dashje”, me pasojë vdekjen.
Materialet i kaluan Prokurorisë, për veprime të mëtejshme.
Discussion about this post