E rikthyer në kabinetin qeveritar si Ministre e Turizmit dhe Mjedisit, por edhe drejtuese politike e Gjirokastrës Mirela Kumbaro është entuziazmuar dhe në postimet e saj në rrejtët sociale zotohet se do të mbajë përgjegjësi pas besimit që u dha në mandatin qeverisës “Rama 3”.
“Kjo javë që po mbyllet shënoi një fillim të ri për përgjegjësi të reja Është koha të them se detyrat në qeverisje, angazhimi si deputete në Qarkun e Gjirokastrës, janë tashmë pjesë e jetës time aktive. Janë pjesë e jetës time sepse janë pjesë e besimit tim për ta bërë Shqipërinë më të mirë nga ç’është sot. Këtë besim ma edukuan gratë dhe burrat e Qarkut të Gjirokastrës, duke bashkëjetuar çdo javë, çdo muaj e çdo vit nga 2017 e deri sot, me vështirësitë dhe gëzimet e njerëzve të tokës, të punës, të dijes, të sofrës dhe të bujarisë në Gjirokastër e Libohovë, në Tepelenë, Përmet e Këlcyrë, nga Dropulli në Memaliaj. Andaj detyrën që Partia Socialiste, më caktoi si drejtuese politike e këtij Qarku e marr si më të madhin nderim, por edhe si një përgjegjësi serioze, sepse u detyrohem shumë banorëve të të 7 bashkive të Qarkut’, shkruan Kumbaro.
Teksa zëvendëson ministrin Bledi Klosi në Ministrinë e Mjedisit, ndërsa Bledi Çuçin si drejtues politik të qarkut, Kumbara thotë se ai e kreu këtë detyrë mirë, ndaj është sfidë e saj të ecë në këtë frymë.
“Por e marr edhe si sfidë e mbarësi. Pasi Bledi Çuçi e kreu këtë detyrë aq bukur politikisht dhe aq njerëzisht të ndërtuar mirë, duke vendosur një standard qytetarie të frymës së ekipit, të punës në grup me njerëzit dhe me strukturat, kujtdo pas tij i mbetet një sfidë e madhe për ta arritur. Kjo sfidë sot është e imja”, shkruan Kumbaro.
Mirela Kumbara u rikthye në mandatin e tretë qeverisës të socialistëve dhe iu besuan dy poste të rëndësishmë nga Kryeministri Edi Rama. Ndonëse si ministre Kultura Kumbaro nuk mbahet mend për ndonjë arritje në këtë fushë, Rama e rikthen në qeveri si të besuarën e tij edhe në qarkun e Gjirokastrës ku do jetë drejtuese politike.
