Alesia Lumi, një police 22 vjeçare ka ndërruar jetë këtë të martë në ambientet e Spitalit të Traumës, një javë pasi u rrëzua te Piramida e Tiranës. Alesia kishte shkuar atje me familjen, ishte jashtë shërbimit, por për shkaqe ende të panjohura është rrëzuar në shkallë dhe ka goditur kokën.
Një javë ajo u dergj në shtratin e spitalit dhe pavarësisht betejës për jetën, sot ka mbyllur sytë përgjithmonë në lule të rinisë. Lajmi i rrëzimit të saj është bërë publik vetëm sot
Ajo po merrte trajtim te Neurologjia prej më shumë se një jave në spitalin ku edhe dha frymën e fundit. Fatkeqësisht 22-vjeçarja nuk i mbijetoi dot plagëve dhe ndërroi jetë në spital.
Është e paqartë dhe njëkohësisht e paimagjinueshme sesi është rrëzuar Alesia në shkallët e Piramidës, kur ajo supozohet të ishte një nga objektet simbol të kryeqytetit më të sigurta, edhe pas transformimit rrënjësor të financuar nga Fondacioni Shqiptaro-Amerikan për Zhvillim.
Miliona lekë janë shpenzuar në rikonstruksionin e Piramidës, por siç duket kushtet e punës nuk janë zbatuar ashtu siç duhet, sepse është e papranueshme që një person të rrëzohet në objekt të hapur publik dhe i trumbetuar nga Bashkia e Tiranës dhe vetë AADF si një xhevahir për kryeqytetin.
Sa të sigurtë janë fëmijët e çdo moshe që zgjedhin që të ngjiten në shkallët e Piramidës në çdo orar të ditës?! Kush përgjigjet për kushtet e sigurinë e një prej objekteve simbol të kryeqytetit që pas rikonstruksionit është kthyer dhe në më të frekuentuarin?!
Drejtorët e Përgjithshëm të Fondacionit Shqiptaro-Amerikan për Zhvillim, Martin Mata dhe Aleksandër Sarapuli, i dorëzuan katër vite më parë Bashkisë së Tiranës projektin arkitektonik dhe inxhinierik të Piramidës dhe modelin e biznesit, me qëllim që funksionimi i saj të jetë i qëndrueshëm financiarisht.
Ndërkohë grupi hetimor po vijon punën për zbardhjen e plotë të rrethanave të ngjarjes.
Discussion about this post