“Spiune e paguar nga britanikët”, për këtë akuzohet tashmë gazetarja ruse Marina Ovsyannikova, e cila u shfaq papritur në një program live lajmesh të televizionit shtetëror rus Channel One, pak ditë më parë me një pankartë kundër luftës në Ukrainë.
Kirill Kleimyonov, drejtori i kanalit, sot në një video ka bërë një akuzë të rëndë: “Jo shumë kohë para protestës, sipas informacioneve tona, Ovsyannikova ka folur me Ambasadën britanike”, tha ai, duke u cituar gjithashtu nga media të ndryshme britanike. Më 15 mars, Osvyannikova u shfaq duke mbajtur një tabelë kartoni me fjalët “Stop luftës”.
“Nuk ka marrëdhënie me ne, është thjesht një tjetër gënjeshtër e shtyrë nga makina e dezinformimit të Kremlinit,” u përgjigj një zëdhënës i ministrisë së jashtme të qeverisë së Boris Johnson. Më parë, siç ishte raportuar nga BBC, gazeta e opozitës ruse “Novaia Gazeta” kishte shkruar se Ovsiannikova – e ndaluar dhe më pas e liruar nga policia pas deklaratës televizive – ishte marrë në pyetje për një kohë të gjatë në Moskë me dyshimin për kontakte të supozuara me shërbimet sekrete të huaja.
Discussion about this post