Shkarkimi i Jose Mourinho-s, edhe pse i pritshëm, bëri shumë zhurmë në Itali, fundja bëhet fjalë për një nga trajnerët më të mirë në qarkullim. Që nga dita kur u largua mes lotësh nga Roma për Jose Mourinho-n dhe të ardhmen e tij do të dëgjojmë shumë, “Speciali” do të jetë si një hije për çdo trajner që drejton një klub të madh. Çfarë pritet të ndodhë tani me Jose Mourinho-n?
Sigurisht disa ditë pushim janë të pashmangshme, por Mou nuk është nga ato trajner që i pëlqen të qëndrojë gjatë pa aksion. Një emër kaq i madh duket i destinuar për Premier League, i shkon shumë si kampionat, por eksperiencat e tij në ishull kanë përfunduar të gjitha me shkarkime të bujshme pavarësisht se kudo që ka shkuar ka fituar respektin e tifozëve. Për momentin, Newcastle duket opsioni më i mundshëm, një skuadër që ka buxhet, por që nuk po arrin të konkurrojë në nivele të larta.
Një opsion mund të jenë edhe dy ekipet e tjera Chelsea dhe Man.United, të dyja në krizë rezultatesh, por drejtuesit e rinj të këtyre klubeve e kanë pak të vështirë të ndryshojë trajner tani. Emri i tij qarkullon edhe në Spanjë, por dy klubet “big”, Reali dhe Barça i kanë trajnerët, më shumë se sa një pistë konkrete për të zëvendësuar Xavi-n, lajmet që qarkullojnë janë sensacione mediatike.
Pak kohë më parë emri i tij u lidh edhe me një kalim të mundshëm te Brazili, por 5 herë kampionët e botës sapo prezantuan trajnerin e ri, Dorival Junior. Vet Mourinho pak kohë më parë theksoi se herët apo vonë do të drejtoj në Arabinë Saudite, sheikët janë gati ta “veshin me ar” në çdo moment.
Discussion about this post