Gjyqtarja Manjola Bejleri e a konsideruar të padrejtë vendimin e sotëm të KPK për shkarkimin e saj nga detyra. Në një reagim për mediat, Bejleri deklaron se vendimi është në kundërshtim me ligjin dhe të gjitha provat e paraqitura sipas saj në proces.
“Relacioni i KPK ishte i mbështetur në të pavërteta, hamendësime dhe në shifra të manipuluara e të dyfishuara qëllimisht në mënyrë flagrante. Unë kam një karrierë prej mbi dy dekadash si gjyqtare, kam gjykuar me mijëra çështje dhe e kam shumë të qartë që kam prekur dhe shumë interesa”, ka shkruar ajo.
Ndërsa ka shtuar se sipas saj, komisioni nuk e kishte studiuar siç duhet provat për analizat financiare.
“Nga zhvillimi i seancës dëgjimore u duk qartë që komisioni nuk i kishte lexuar e studiuar fare prapësimet e mia dhe ato dhjetëra prova të paraqitura nga unë rishtazi, që evidentonin gabimet e rënda të tyre për analizën time financiare. Një komision që zhvillon seancë dëgjimore prej disa orësh, pa dosje përpara dhe pa bërë asnjë pyetje të vetme, tregon qartë që vendimi ishte i paracaktuar”, ka shkruar ajo.
Shkrimin e saj Bejleri e mbyll, duke pretenduar se ka luftuar gjithmonë për të drejtën dhe do të vazhdojë ta bëjë.
