Presidenti i “Yldon Media Group”, i Ylli Ndroqi ka reaguar për herë të parë në lidhje me vendimin e DASH, për shpalljen non-grata. Sipas tij, vendimi është marrë mbi informacione të gabuara dhe se beson te drejtësia. Ndër të tjera, duke hedhur poshtë të gjitha akuzat ai thotë do të përdorë të drejtën e tij për të kërkuar heqjen e emrit nga lista duke vënë në dispozicion të autoriteteve çdo informacion që ato të kenë nevojë.
“Kam respektuar ligjet e RSH duke kontribuar për ekonominë e vendit. Vlerësoj të ndaj me publikun faktin se nuk kam mbajtur asnjë pozicion në administratën shtetërore. Unë besoj fort tek organet e drejtësisë dhe prej 2 vitesh po mbroj të vërtetën time para Gjykatës së Posaçme Kundër Krimit të Organizuar dhe Korrupsionit dhe kam besim që ajo do të vendosë si një gjykatë e pavarur dhe e krijuar me ligj.
Unë besoj në vlerat mbi të cilat janë krijuar dhe funksionojnë SHBA, të cilat janë universale. Po ashtu, duke vlerësuar që ky vendim është marrë mbi bazën e informacioneve të gabuara, duke besuar fort në drejtësinë e vendimmarrjes së institucioneve të SHBA, do të përdor të drejtën time për të kërkuar heqjen e emrit nga lista duke vënë në dispozicion të autoriteteve çdo informacion që ato të kenë nevojë. Vlerësoj me rëndësi të sqaroj publikun se sipas legjislacionit amerikan vendosja e emrit në këtë listë është e rishikueshme dhe nuk ka të bëjë me asnjë nga rastet e mëparshme në Shqipëri”, shprehet ai. Ndërkohë, nuk dihet se me cilin emër do të bëjnë ankimimin, pasi SHBA ka publikuar të dy emrat e tij.
Kujtojmë se bashkë me të DASH ka futur në listën e zezë edhe ish deputetin Aqif Rakipi si dhe zyrtarë të tjerë në Ballkan.
Discussion about this post